تأليف : د.نورهان إبراهيم

الشخص المناسب اللي هيجي يحبنا و يقبلنا بكل عيوبنا و أخطاءنا و مشاكلنا و يفهمنا و يحتوينا و يحترمنا مش موجود في الأفلام و بس ... هو موجود في الحقيقة كمان بس الفرق الوحيد إننا بنستعجل ظهوره في حياتنا فبنقبل بالموجود و نرضى باللي بيتقدملنا مهما كان قليل علشان مفيش غيره و نسكت نفسنا بجملة : " أصل اللي نفسنا فيه ده موجود في الأفلام بس .. كفاية علينا نتفرج عليه " ، مش معنى إنك ما لاقيتش مقاسك من الحاجة اللي عاجباك في المحل إنك تاخد حاجة مش مقاسك أو حاجة مش لايقة عليك لمجرد إن هو ده اللي موجود بدل ما تدور في محل تاني و تستنى الحاجة اللي تناسبك اوعى تقبل غير بحب يرويك بعد سنين عطش ............................... الواحد ما بيختارش اللي بيحبه ولا بيقول أنا هحب ده علشان شكله حلو ، الواحد بيحب قلب يحتويه و روح تكمله و حضن معمول على مقاسه هو و بس و ما يساعهوش مكان في الدنيا غيره ، انت بتحب شخص يبقى مريحك انت مش مريح الناس ، الحب إنك تلاقي نفسك في حد تاني ، الحب أرواح بتتلاقى قبل أي حاجة و قلوب تتعشق في بعض ما يفرقهاش إلا الموت ................ انت عمرك ما كنت مسئول عن قدرك بإنك تقع ... بس من لحظة وقوعك انت مسئول عن إنك تقوم تاني و تقف على رجليك ................. حياتك دي بتاعتك انت , خاضعة فقط للي انت و بس بتحبه و مُقتنع بيه و شايفه صح من وجة نظرك مدام مش بتيجي على المساحة الشخصية لأي حد ... حياتك و ميولك و اهتماماتك و أفكارك مش مسألة مطروحة للنقاش بأي شكل كان , ولا حتى مسموح إن حد يُبدي رأيه فيها ... عيش بطيبعتك ، الأحلى من إنك تبقى مختلف إنك ماتكونش قاصد تبقى مختلف ... المهم تكون " انت " ، مش لازم كل حاجة بتعملها و بتحبها يكون كل الناس بيحبوها كفاية تكون انت مبسوط و مستمتع ... ‏اتبسط و عيش بطريقتك

---